Restoran i plažni bar na mondenskom kupalištu Galija, na Crvenoj glavici nadomak Svetog Stefana uništeni su nakon što se nekoliko stijena teških više tona obrušilo sa kosine iznad ove plaže.
Zakupca koji je jutros došao na plažu kako bi počeo sa uređenjem dočekao je porušeni krov i uništen dio inventara, dok je jedna od stijena ostala nad dijelom plažnog bara.
Kako je “Vijestima” rečeno, ovo se iz godinu u godinu dešava, te zbog neriješenog problema kosine i strmine brda iznad ove skrivene plaže, dolazi do obrušavanja, pa im je 2019. kao i sada restoran bio potpuno uništen.
Zakupac je spreman da odmah započne sanaciju terena i izgradnju potpornog zida, jer postoji ozbiljna bojazan da bi se ovakav incident mogao dogoditi tokom ljetnje sezone, što bi dovelo u opasnost kupače.
Galija važi za popularno kupalište i tokom ljeta na njoj se relaksira više stotina turista.
